ਮੁੰਬਈ, 27 ਜੂਨ, (ਯੂ.ਐਨ.ਆਈ.)- ਮਹਾਰਾਸ਼ਟਰ ’ਚ ਚੱਲ ਰਹੇ ਸਿਆਸੀ ਸੰਕਟ ਵਿਚਾਲੇ ਸ਼ਿਵ ਸੈਨਾ ਦੇ ਸੰਸਦ ਮੈਂਬਰ ਸੰਜੇ ਰਾਉਤ ਨੂੰ ਵੱਡਾ ਝਟਕਾ ਲੱਗਾ ਹੈ। ਸ਼ਿੰਦੇ ਧੜੇ ’ਤੇ ਲਗਾਤਾਰ ਨਿਸ਼ਾਨਾ ਸਾਧ ਰਹੇ ਸ਼ਿਵ ਸੈਨਾ ਦੇ ਸੰਸਦ ਮੈਂਬਰ ਨੂੰ ਇਨਫੋਰਸਮੈਂਟ ਡਾਇਰੈਕਟੋਰੇਟ ਨੇ ਸੋਮਵਾਰ ਨੂੰ ਸੰਮਨ ਭੇਜ ਕੇ ਭਲਕੇ ਪੇਸ਼ ਹੋਣ ਲਈ ਕਿਹਾ ਹੈ। ਨੂੰ ਈਡੀ ਦੀ ਤਰਫੋਂ ਮਨੀ ਲਾਂਡਰਿੰਗ ਮਾਮਲੇ ’ਚ ਪੁੱਛਗਿੱਛ ਲਈ ਬੁਲਾਇਆ ਗਿਆ ਹੈ। ਦੱਸ ਦੇਈਏ ਕਿ ਮਹਾਰਾਸ਼ਟਰ ਸਰਕਾਰ ਦੇ ਮੰਤਰੀ ਨਵਾਬ ਮਲਿਕ ਅਤੇ ਸਾਬਕਾ ਮੰਤਰੀ ਅਨਿਲ ਦੇਸ਼ਮੁਖ ਮਨੀ ਲਾਂਡਰਿੰਗ ਦੇ ਮਾਮਲੇ ਵਿੱਚ ਪਹਿਲਾਂ ਹੀ ਹਿਰਾਸਤ ਵਿੱਚ ਹਨ। ਹੁਣ ਸਿਆਸੀ ਉਥਲ-ਪੁਥਲ ਦਰਮਿਆਨ ਸੰਜੇ ਰਾਉਤ ਨੂੰ ਸੰਮਨ ਭੇਜਿਆ ਗਿਆ ਹੈ। ਦੱਸ ਦੇਈਏ ਕਿ  ਅਪ੍ਰੈਲ ਵਿੱਚ ਐਨਫੋਰਸਮੈਂਟ ਡਾਇਰੈਕਟੋਰੇਟ (ਈਡੀ) ਨੇ  ਸ਼ਿਵ ਸੈਨਾ ਨੇਤਾ ਦੀ ਅਲੀਬਾਗ ਜ਼ਮੀਨ ਅਤੇ ਦਾਦਰ ਫਲੈਟ ਕੁਰਕ ਕਰਨ ਦਾ ਨੋਟਿਸ ਦਿੱਤਾ ਸੀ। ਈਡੀ ਦਾ ਦਾਅਵਾ ਹੈ ਕਿ ਗੋਰੇਗਾਂਵ ਵਿੱਚ ਪਾਤਰਾ ਚਾਵਲ ਪੁਨਰਵਾਸ ਪ੍ਰੋਜੈਕਟ ਵਿੱਚ ਬਿਲਡਰ ਨੇ ਬੇਨਿਯਮੀਆਂ ਕਰਕੇ 1,039 ਕਰੋੜ ਰੁਪਏ ਕਮਾਏ ਅਤੇ ਉਸੇ ਪੈਸੇ ਵਿੱਚੋਂ 55 ਲੱਖ ਰੁਪਏ ਗੁਰੂ ਆਸ਼ੀਸ਼ ਕੰਪਨੀ ਦੇ ਡਾਇਰੈਕਟਰ ਪ੍ਰਵੀਨ ਰਾਉਤ ਨੇ ਸੰਜੇ ਰਾਉਤ ਦੀ ਪਤਨੀ ਨੂੰ ਦਿੱਤੇ। ਜਿਸ ਨੇ ਜਾਇਦਾਦ ਖਰੀਦੀ ਸੀ। ਹੁਣ ਉਸ ਨੂੰ ਇਸ ਮਾਮਲੇ ਵਿੱਚ ਪੁੱਛਗਿੱਛ ਲਈ ਬੁਲਾਇਆ ਗਿਆ ਹੈ। ਜ਼ਿਕਰਯੋਗ ਹੈ ਕਿ ਸ਼ਿਵ ਸੈਨਾ ’ਤੇ ਕੰਟਰੋਲ ਨੂੰ ਲੈ ਕੇ ਊਧਵ ਠਾਕਰੇ ਅਤੇ ਬਾਗੀ ਵਿਧਾਇਕ ਏਕਨਾਥ ਸ਼ਿੰਦੇ ਵਿਚਾਲੇ ਚੱਲ ਰਹੀ ਤਕਰਾਰ ਦੌਰਾਨ ਪਾਰਟੀ ਨੇਤਾ ਸੰਜੇ ਰਾਉਤ ਨੇ ਸ਼ਨੀਵਾਰ ਨੂੰ ਬਾਗੀ ਵਿਧਾਇਕਾਂ ਨੂੰ ਵਿਧਾਨ ਸਭਾ ਦੀ ਮੈਂਬਰਸ਼ਿਪ ਛੱਡਣ ਅਤੇ ਨਵੇਂ ਸਿਰੇ ਤੋਂ ਚੋਣਾਂ ਦਾ ਸਾਹਮਣਾ ਕਰਨ ਦੀ ਚੁਣੌਤੀ ਦਿੱਤੀ। ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਇਹ ਵੀ ਕਿਹਾ ਸੀ ਕਿ ਜੋ ਲੋਕ ਵਾਪਸ ਆਉਣਾ ਚਾਹੁੰਦੇ ਹਨ ਉਨ੍ਹਾਂ ਲਈ ਪਾਰਟੀ ਦੇ ਦਰਵਾਜ਼ੇ ਖੁੱਲ੍ਹੇ ਹਨ। ਉਨ੍ਹਾਂ ਉਮੀਦ ਜਤਾਈ ਕਿ ਸ਼ਿਵ ਸੈਨਾ, ਐਨਸੀਪੀ ਅਤੇ ਕਾਂਗਰਸ ਦੀ ਮਹਾ ਵਿਕਾਸ ਅਘਾੜੀ (ਐਮਵੀਏ) ਸਰਕਾਰ ਮੌਜੂਦਾ ਸੰਕਟ ਵਿੱਚੋਂ ਬਾਹਰ ਆ ਜਾਵੇਗੀ। ਰਾਉਤ ਨੇ ਪੱਤਰਕਾਰਾਂ ਨੂੰ ਕਿਹਾ, ’’ਬਾਗ਼ੀਆਂ ਨੂੰ ਮੇਰੀ ਖੁੱਲ੍ਹੀ ਚੁਣੌਤੀ ਅਸਤੀਫਾ ਦੇਣ ਅਤੇ ਆਪਣੇ ਵੋਟਰਾਂ ਤੋਂ ਨਵੇਂ ਫਤਵੇ ਦੀ ਮੰਗ ਕਰਨ ਦੀ ਹੈ। ਪਿਛਲੇ ਦਿਨੀਂ ਛਗਨ ਭੁਜਬਲ, ਨਰਾਇਣ ਰਾਣੇ ਅਤੇ ਉਨ੍ਹਾਂ ਦੇ ਸਮਰਥਕਾਂ ਨੇ ਦੂਜੀਆਂ ਪਾਰਟੀਆਂ ਵਿੱਚ ਸ਼ਾਮਲ ਹੋਣ ਲਈ ਸ਼ਿਵ ਸੈਨਾ ਦੇ ਵਿਧਾਇਕਾਂ ਵਜੋਂ ਅਸਤੀਫਾ ਦੇ ਦਿੱਤਾ ਸੀ। ਇੱਥੋਂ ਤੱਕ ਕਿ ਮੱਧ ਪ੍ਰਦੇਸ਼ ਵਿੱਚ (ਕੇਂਦਰੀ ਮੰਤਰੀ) ਜੋਤੀਰਾਦਿੱਤਿਆ ਸਿੰਧੀਆ ਦੇ ਸਮਰਥਕਾਂ ਨੇ (ਮਾਰਚ 2020 ਵਿੱਚ) ਕਾਂਗਰਸੀ ਵਿਧਾਇਕਾਂ ਵਜੋਂ ਅਸਤੀਫਾ ਦੇ ਦਿੱਤਾ ਸੀ। ਉਨ੍ਹਾਂ ਕਿਹਾ ਸੀ ਕਿ ਸ਼ਿਵ ਸੈਨਾ ਦੇ ਆਗੂ ਅਤੇ ਵਰਕਰ ਤਿਆਰ ਹਨ ਅਤੇ ਲੀਡਰਸ਼ਿਪ ਦੇ ਸੰਕੇਤ ਦੀ ਉਡੀਕ ਕਰ ਰਹੇ ਹਨ। ਉਨ੍ਹਾਂ ਸੰਕੇਤ ਦਿੱਤਾ ਕਿ ਪਾਰਟੀ ਬਾਗੀਆਂ ਨਾਲ ਨਜਿੱਠਣ ਲਈ ਤਿਆਰ ਹੈ। ਇਸ ਤੋਂ ਪਹਿਲਾਂ, ਉਸਨੇ ਟਵੀਟ ਕੀਤਾ ਸੀ ਕਿ ਉਹ (ਵਿਧਾਇਕ) ਗੁਹਾਟੀ, ਅਸਾਮ ਵਿੱਚ ਕਿੰਨਾ ਚਿਰ “ਛੁਪੇ“ ਰਹਿਣਗੇ, ਆਖਿਰਕਾਰ ਉਨ੍ਹਾਂ ਨੂੰ “ਚੌਪਾਟੀ“ (ਮੁੰਬਈ ਦੇ ਸੰਦਰਭ ਵਿੱਚ) ਆਉਣਾ ਪਏਗਾ।  ਸ਼ਿਵ ਸੈਨਾ ਦੇ ਸੰਸਦ ਮੈਂਬਰ ਰਾਉਤ ਨੇ ਟਵੀਟ ਕੀਤਾ ਸੀ, ’’ਗੁਹਾਟੀ ’ਚ ਕਦੋਂ ਤੱਕ ਲੁਕੋਗੇ, ਚੌਪਾਟੀ ’ਚ ਆਉਣਾ ਪਵੇਗਾ।’’ ਦੱਖਣੀ ਮੁੰਬਈ ’ਚ ਮੰਤਰਾਲਾ (ਰਾਜ ਸਕੱਤਰੇਤ), ਵਿਧਾਨ ਭਵਨ (ਵਿਧਾਨਕ ਕੰਪਲੈਕਸ), ਰਾਜ ਭਵਨ ਅਤੇ ਮੁੱਖ ਮੰਤਰੀ ਦੇ ਸਰਕਾਰੀ ਬੰਗਲੇ ਸਮੇਤ ’ ਵਰਸ਼ਾ’ ਪ੍ਰਮੁੱਖ ਸਰਕਾਰੀ ਅਦਾਰੇ ਗਿਰਗਾਉਮ ਬੀਚ ਦੇ ਆਸ ਪਾਸ ਸਥਿਤ ਹਨ, ਜਿਸਨੂੰ ਗਿਰਗਾਉਮ ਚੌਪਾਟੀ ਵੀ ਕਿਹਾ ਜਾਂਦਾ ਹੈ।