ਰਜਿ: ਨੰ: PB/JL-124/2018-20
RNI Regd No. 23/1979

ਦੁਨੀਆਂ ਦੇ ਟਾਪ 10 ਅਮੀਰਾਂ ਦੀ ਸੂਚੀ ’ਚੋਂ ਬਾਹਰ ਹੋਏ ਮੁਕੇਸ਼ ਅੰਬਾਨੀ
 
BY admin / January 23, 2023
ਮੁੰਬਈ, 23 ਜਨਵਰੀ (ਯੂ. ਐਨ. ਆਈ.)-ਮੁਕੇਸ਼ ਅੰਬਾਨੀ ਦੀ ਕੰਪਨੀ ਰਿਲਾਇੰਸ ਇੰਡਸਟਰੀਜ਼ ਭਾਰਤ ਵਿੱਚ ਮਾਰਕਿਟ ਕੈਪ ਦੇ ਲਿਹਾਜ਼ ਨਾਲ ਸਭ ਤੋਂ ਵੱਡੀ ਕੰਪਨੀ ਹੈ ਅਤੇ ਮੁਕੇਸ਼ ਅੰਬਾਨੀ ਇਸ ਦੇ ਮਾਲਕ ਹਨ । ਲੰਬੇ ਸਮੇਂ ਤੋਂ ਉਹ ਬਲੂਮਬਰਗ ਬਿਲੀਅਨੇਰ ਇੰਡੈਕਸ ਦੀ ਦੁਨੀਆ ਦੇ ਚੋਟੀ ਦੇ 10 ਸਭ ਤੋਂ ਅਮੀਰ ਲੋਕਾਂ ਦੀ ਸੂਚੀ ਵਿੱਚ ਸ਼ਾਮਿਲ ਸੀ, ਪਰ ਪਿਛਲੇ ਹਫ਼ਤੇ ਉਨ੍ਹਾਂ ਦੀ ਦੌਲਤ ਵਿੱਚ ਕਮੀ ਆਉਣ ਕਾਰਨ ਉਹ ਇਸ ਵੱਕਾਰੀ ਸੂਚੀ ਤੋਂ ਬਾਹਰ ਹੋ ਗਏ ਹਨ । ਮੁਕੇਸ਼ ਅੰਬਾਨੀ ਕੋਲ ਇਸ ਸਮੇਂ ਕੁੱਲ ਜਾਇਦਾਦ 85.2 ਅਰਬ ਡਾਲਰ ਦੀ ਹੈ ਅਤੇ ਉਨ੍ਹਾਂ ਦੀ ਸੰਪਤੀ ਪਿਛਲੇ ਅੰਕੜੇ ਨਾਲੋਂ 778 ਮਿਲੀਅਨ ਡਾਲਰ ਘੱਟ ਗਈ ਹੈ। ਜੇਕਰ ਇਸ ਸਾਲ ਦੀ ਸਥਿਤੀ ‘ਤੇ ਨਜ਼ਰ ਮਾਰੀਏ ਤਾਂ ਮੁਕੇਸ਼ ਅੰਬਾਨੀ ਦੀ ਕੁੱਲ ਜਾਇਦਾਦ ਵਿੱਚ1.93 ਅਰਬ ਡਾਲਰ ਦੀ ਕਮੀ ਆਈ ਹੈ। ਮੁਕੇਸ਼ ਅੰਬਾਨੀ ਦੇ ਇਸ ਸੂਚੀ ਵਿੱਚੋਂ ਬਾਹਰ ਹੋਣ ਮਗਰੋਂ ਹੁਣ ਅਮੀਰਾਂ ਦੀ ਟਾਪ 10 ਸੂਚੀ ਵਿੱਚ ਸਿਰਫ਼ ਇੱਕ ਭਾਰਤੀ ਹੈ ਅਤੇ ਉਹ ਅਡਾਨੀ ਗਰੁੱਪ ਦੇ ਮਾਲਕ ਗੌਤਮ ਅਡਾਨੀ ਹਨ । ਗੌਤਮ ਅਡਾਨੀ ਕੋਲ ਇਸ ਸਮੇਂ 121 ਬਿਲੀਅਨ ਡਾਲਰ ਦੀ ਜਾਇਦਾਦ ਹੈ ਅਤੇ ਇਸ ਸਾਲ ਉਸ ਨੇ 188 ਮਿਲੀਅਨ ਡਾਲਰ ਦੀ ਸੰਪਤੀ ਹਾਸਲ ਕੀਤੀ ਹੈ। ਦੱਸ ਦੇਈਏ ਕਿ ਇਸ ਸਮੇਂ ਦੁਨੀਆ ਦੇ ਸਭ ਤੋਂ ਅਮੀਰ ਵਿਅਕਤੀ ਬਰਨਾਰਡ ਅਰਨੌਲਟ ਹਨ, ਜਿਨ੍ਹਾਂ ਕੋਲ 186 ਬਿਲੀਅਨ ਡਾਲਰ ਦੀ ਜਾਇਦਾਦ ਹੈ ਅਤੇ ਇਸ ਸਾਲ ਉਸ ਨੇ 23.9 ਬਿਲੀਅਨ ਡਾਲਰ ਦੀ ਜਾਇਦਾਦ ਆਪਣੇ ਨਾਂ ਕਰ ਲਈ ਹੈ । ਲੰਬੇ ਸਮੇਂ ਤੱਕ ਦੁਨੀਆ ਦੇ ਨੰਬਰ ਇੱਕ ਸ਼ਖਸ ਰਹੇ ਐਲੋਨ ਮਸਕ ਹੁਣ ਦੂਜੇ ਸਥਾਨ ‘ਤੇ ਹਨ ਅਤੇ ਉਨ੍ਹਾਂ ਕੋਲ 139 ਬਿਲੀਅਨ ਡਾਲਰ ਦੀ ਜਾਇਦਾਦ ਹੈ। ਇਸ ਸਾਲ ਐਲੋਨ ਮਸਕ ਨੇ ਹੋਰ 1.64 ਬਿਲੀਅਨ ਡਾਲਰ ਦੀ ਜਾਇਦਾਦ ਹਾਸਲ ਕੀਤੀ ਹੈ। ਇਸ ਤੋਂ ਇਲਾਵਾ ਗੌਤਮ ਅਡਾਨੀ ਤੀਜੇ ਸਥਾਨ ‘ਤੇ ਹਨ ਅਤੇ ਉਨ੍ਹਾਂ ਦੀ ਕੁੱਲ ਜਾਇਦਾਦ 121 ਬਿਲੀਅਨ ਡਾਲਰ ਹੈ। ਐਮਾਜ਼ਾਨ ਦੇ ਸੰਸਥਾਪਕ ਜੈਫ ਬੇਜੋਸ 120 ਬਿਲੀਅਨ ਡਾਲਰ ਦੀ ਸੰਪਤੀ ਨਾਲ ਚੌਥੇ ਨੰਬਰ ‘ਤੇ, ਮਾਈਕ੍ਰੋਸਾਫਟ ਦੇ ਬਿਲ ਗੇਟਸ 111 ਬਿਲੀਅਨ ਡਾਲਰ ਦੀ ਸੰਪਤੀ ਨਾਲ ਪੰਜਵੇਂ ਸਥਾਨ ‘ਤੇ, ਵਾਰੇਨ ਬਫੇ ਕੁੱਲ ਜਾਇਦਾਦ $108 ਬਿਲੀਅਨ ਨਾਲ ਛੇਵੇਂ ਸਥਾਨ ‘ਤੇ, ਲੈਰੀ ਐਲੀਸਨ 97.5 ਬਿਲੀਅਨ ਡਾਲਰ ਦੀ ਕੁੱਲ ਜਾਇਦਾਦ ਨਾਲ ਸੱਤਵੇਂ ਸਥਾਨ ‘ਤੇ, ਲੈਰੀ ਪੇਜ 90.9 ਬਿਲੀਅਨ ਡਾਲਰ ਦੀ ਜਾਇਦਾਦ ਨਾਲ ਅੱਠਵੇਂ ਸਥਾਨ ‘ਤੇ,ਸਰਗੇਈ ਬ੍ਰਿਨ 87.2 ਅਰਬ ਡਾਲਰ ਦੀ ਜਾਇਦਾਦ ਨਾਲ ਨੌਵੇਂ ਸਥਾਨ ‘ਤੇ ਅਤੇ ਸਟੀਵ ਬਾਲਮਰ 86.1 ਅਰਬ ਡਾਲਰ ਦੀ ਜਾਇਦਾਦ ਨਾਲ 10ਵੇਂ ਸਥਾਨ ‘ਤੇ ਬਰਕਰਾਰ ਹਨ।